Sobre a malla - About chainmaille

Hoxe, e grazas aos que me insististes tanto, animeime a preparar un resumo moi resumidiño da historia da malla e das familias, tipos e nomes das distintas cadeas de malla. Existen na rede moitas explicacións ao respecto, aínda que a maioría están en inglés.
Today I am going to talk a little bit about maille history, families and characteristics. You can find a lot of information about it online, mostly in english. That is why I am only writing this post in galician. Plese visit  http://www.mailleartisans.org/ or http://corvuschainmaille.ning.com/ for detailed information about chainmaille and weaves.

De que falamos
Comecemos resumindo: a malla é un entrelazo de elos. Rematemos complicándonos: segundo a Unión Internacional de Artesáns de Malla, M.A.I.L., (vede aquí  a súa moi interesante páxina con titoriais, artigos, fotos, etc.) unha trama de malla defínese como:

"Un esquema de colocación de elos único e que se pode repetir indefinidamente, caracterizado polo tipo de conexión entre estes elos e que, mediante o uso exclusivo de elos, mantén a estrutura física do entrelazo ou conecta unha unidade de trama con outra adxacente".

Cabalo de xadrez, por David Austin

Cos diversos entrelazos ou tramas fórmanse cadeas, láminas, unidades ou formas en tres dimensións. Coas láminas ou follas fanse cotas de malla, almófares, mantos de bispo, luvas, brafoneiras... Coas cadeas e unidades, pendentes, pulseiras, colgantes, etc, e coas formas en tres dimensións, todo o que se vos ocorra.

Almófar ou cofia feita por nós

Historia e usos
Non se sabe con certeza das súas orixes. Si se coñece que naceu con fins de defensa corporal na batalla. A primeira mención escrita das cotas de malla parece que se atopa en Herodoto, no século V a.C., aínda que semella probable que fose unha invención dos escitas. No Xapón tamén se descubriron cotas de malla anteriores ao X a.C.

 

En Europa, as cotas comezan a aparecer en enterramentos de guerreiros irlandeses e franceses datados a partir do III a.C., e cando os romanos invadiron estes territorios, adoptaron tamén a cota de malla como elemento de protección. Seguíu a ser a forma principal de defensa contra os ataques de corte e de penetración ate ben entrado o século XVIII. Se queredes saber máis datos concretos sobre a historia das cotas de malla e a súa construción, premede aquí para ver a estupenda páxina de Julio del Junco.

Ademais da defensiva, a outra gran categoría onde se emprega a malla é a xoiería. Este uso decorativo foise desenvolvendo nos últimos séculos e, na actualidade, forma parte tanto das coleccións máis clásicas coma das máis innovadoras.

Pulseira de coiro e malla Europa 4-1

Familias

Existen ducias e ducias de tramas que se poden facer con elos. Algunhas teñen moitos séculos, outras estanse a inventar neste momento. Para poñer orde nesta lea, establécense familias de tramas, tomando como base (principalmente) o xeito no que uns elos se conectan cos outros. A clasificación que vos vou comentar non é a única que existe e admite variacións, pero é a máis simple.

Defínense cinco familias principais de cadeas de malla:
- Familia europea: na que a orientación dos elos cambia en cada ringleira.
- Familia xaponesa: onde os elos van conectados perpendicularmente entre si.
- Familia persa: na que a forma de conexión non é lineal.
- Familia espiral: onde a trama de elos adopta forma de hélice.
- Familia híbrida: na que se emprega máis de un estilo de conexión ou algún outro non clasificable nas anteriores familias (orbitais, presas, etc).

E ate aquí chegamos hoxe. Cando poida coméntovos un pouco máis a fondo sobre estas familias e sobre as tramas en particular.